OSIDDE

Su nuraghe S'Iscopalzu de Osidde

Testimòngiu mudu de unu tempus prus chi non coladu

Nch’est a pagos chilòmetros dae Osidde, est a nàrrere una intre sas biddas prus minores de su nugoresu; e nch’est in intro de unu litu de suèrgios seculares. Semus faeddende de su situ archeològicu de S’Iscopalzu.

Semus faeddende de sas ruinas de su bidditzolu antigòriu suo, testimòngias mudas de sos tempos de su brunzu, e de sos chimbe metros de sa turre nuràgica chi, arta, dòminat un’àrea chinta dae muros pesados pro amparare cantu b’at.

Semus faeddende de sos contones iscuadrados chi raighinas ant postu in cussa patada granìtica (e chi forsis dae cue etotu nche los bogheint) e de sas geometrias issoro, a chircu o mancu, chi base fiant de sos fràigos sacros pro sighire s’intrèveru de sas istajones e chi, craras, pintadas parent in su birde isperiadu dae artu.

Semus faeddende de una intre sas mègius testimonias de sa cultura megalìtica sarda de custu logu; testimonia chi contat unas cantas tumbas de Gigantes, bìndighi nuraghes e, in tretos de S’Impicadolzu, sa presèntzia de “Sa perda ‘e santu Pàulu”, unu intre sos prus artos menhir de s’ìsula: sete metros e barda.

Inoghe disinneint de bìvere sos antepassados nostros, in un’iscenàriu naturalìsticu de galania superlativa, càntaru de vida e letu de sas abbas pàsidas de su riu Tirsu bantzighende·si intre baddes dìligas e montigros irrùpidos; in unu logu peutadu dae fedos de pastores caminantes e dae pegos andantanos in fatu; in camineras de tramudàntzias antigas prenas de biodiversidade, de patrimòniu istòricu e culturale de dura che a su pòpulu sardu; in sas àndalas de unu turismu rispetosu chi chircat, agatende·la, una dimensione ispirituale autèntica e de sentidu.

Testu in sardu de Mauro Piredda
Coordinamentu editoriale de Angelo Canu

No posts found!