ORUNE
Su situ de Sant’Efis in Orune
Un'àrea chi nos contat millènnios de istòria 1844
A 700 metros de artària, in intro de unu padente de chercos e a pagos chilòmetros dae Orune, bidda antiga de sa Barbàgia cun identidade bene arraighinada, b’amus s’àrea archeològica de Sant’Efis. Unu logu de maia e de mistèriu chi s’isterret in duos ètaros e barda de sartu e chi, a l’ischire lèghere, unu libru de istòria paret.
Unu libru cun capìtulos chi movent dae s’edade de su brunzu pro nche cròmpere a su de 17 sèculos e cun pàginas contende·nos de pedras fitas, de su chi b’abarrat de unu bidditzolu cun nuraghe massissu, de sas istigas de una funtana sacra, de sos fràigos prus “reghentes” chi iscòbiant un’aposentada cummertziale a inghìriu de una pratza, de una crèsia minore cun navada ùnica e de sos pìgios lassados dae cada època.
E a cunfirmare sa presèntzia de s’òmine dae su neolìticu in susu, in custu logu istratègicu e de grandu importu pro s’economia, bi sunt finamentas sas campagnas de cherta archeològica chi l’interesseint dae sos annos noranta de su sèculu coladu cun istùdios fundudos, repertos bogados a campu, interpretatziones.
Difatis, comente pro sos àteros insediamentos de sa zona, sa nàschida de su situ de Sant’Efis est incuadrada in unu sistema econòmicu territoriale integradu e si ligat a sa bundàntzia de sas resursas ofertas dae su monte e dae su pranu. Probàbile est fintzas chi a custos produtos locales los cummertzieint a probe e a tesu, in su mercadu internu e in sos iscàmbios intre ìsula, Urbe e provìntzias otzidentales, a su chi nos contat sa presèntzia de materiales batidos dae aterue intre su chi nd’ant bogadu a campu sas campagnas archeològicas.
A custu situ, pro more de sa crèsia de su seschentos intitulada a Efis, su màrtire gherreri, lu travigheint finas a sos primos deghènnios de su noighentos pro l’abbandonare de su totu a pustis lassende intreu su rodeu suo de mistèriu.
Testu in sardu de Mauro Piredda
Coordinamentu editoriale de Angelo Canu
No posts found!