LÙVULA
Su santuàriu de Santu Frantziscu de Lùvula
Duas festas mannas de fide comunitària
Su profilu biancu e chietu de su santuàriu arbale de Santu Frantziscu de Lùvula, sìmbulu mannu de ispiritualidade pro totu sa gente de su territòriu nugoresu, brotat a ogros nostros dae sa sàgoma imponente e ìnnida de su Monte Arvu chi paret bardiende·lu e amparende·lu.
S’istrutura nch’est a pagos chilòmetros dae sa bidda connota pro s’istòria minerària e sas traditziones religiosas suas.
Su fràigu est de su de 17 sèculos, cun acontzos de su 1795, e in intro suo b’at un’istàtua de linna de su santu de Assisi, òpera de su seschentos de grandu prètziu e de màdrighe napoletana.
In foras, a inghìriu de sa crèsia, bi sunt sas cumbessias, domitas de pedra: belle unu bidditzolu chi, a tempus suo, est animadu dae sos fideles de su santu. Fideles chi in cue s’atopant pro lu venerare cun sa novena chi comintzat sa prima die de maju e cun su tridu chi antìtzipat sa festa de su 4 de santugaine.
Una festa dòpia, duncas, chi movet dae su contu de sa crèsia fraigada dae chie, bandidende e custrintu a si mòvere a de note pro more de un’acontèssida delituosa, torreit gràtzias a Frantziscu invocadu pro mustrare s’innotzèntzia sua. Pro custu est chi su pellegrinàgiu, de 30 chilòmetros e barda, lu faghent a de note in atòngiu dae sa crèsia nugoresa de sa Solidae finas a su santuàriu luvulesu.
Custas festas sunt duos addòbios comunitàrios cun mùsica e ballos sardos e cun pratos de su connotu che a su filindeu, filos de pasta prus chi non fines aprontados cun maestria artesanale e cotos in su brou de berbeghe.
Finida sa festa, su simulacru lassat su santuàriu luvulesu pro chi nche torret a Nùgoro. Sos fideles, bardiende·lu chie a pees chie a caddu, cròmpidos a su sartu de S’Àrbore, s’atopant cun sos pellegrinos de su cabu de logu cumbidende·si pari pari. A sero s’istàtua movet conca a tzitade e, una borta in cue, li faghent fàghere tres giros a inghìriu de sa crèsia de su Rosàriu pro nche la giùghere, a pustis, a ue su priore nou chi at a remunire s’istendardu finas a su mese de maju de s’annu a pustis.
Testu in sardu de Mauro Piredda
Coordinamentu editoriale de Angelo Canu
No posts found!