Si contat chi in su tempus antigu, in sartu de Lodè, in sos oros de su Riu Minore biviant duas populatziones. In s’oru cara a sole, in Norchirì, istaiant sos Gigantes, ue aiant fraigadu su nuraghe Sas Melas; in s’oru a tramuntana istaiant sos Naneddos chi, pro si cuare dae sos Gigantes, aiant forrogadu sas domos issoro in sas rocas de Janna de Oriavula.

Fiant minores de carena ma abbistos meda e frunidos de poderes màgicos, a tales chi fiant a tretu de poderare sa fortza de sos Gigantes, èsseres betze mannos cun una fortza istremenada. Lodè at mantesu bias e fortes sas raighinas suas, ascusòrgiu de traditziones pedrales, contos e paristòrias chi si perdent in su tempus.

Cala de sos naneddos est su nùmene chi in sa bidda li narant a sas domos de janas, sas tumbas ipogèicas, isfossadas in sa roca, ue sos neolìticos poniant sos mortos. Sa casta de granitu chi s’agatat in custu territòriu non permitiat de “fraigare” tumbas mannas meda e cun una planimetria cumplessa, pro cussu sas calas de sos naneddos sunt minores, bortas meda cun unu aposentu ebbia.

Sa tumba de Janna de Oriavula nd’at tres de aposentos e galu oe si podent sejare sas tratas de su picu de iscavu chi ant impreadu sos neolìticos pro li dare sa forma.

Oe Lodè s’agatat in su coro de sa Riserva de Biosfera Tepilora, Riu Pasada e Monte Arvu, in unu territòriu esèmpiu de una biodiversidade ispantosa, ma parende s’origra paret de los intèndere sos Naneddos, afainados in su fràigu de sas calas issoro, amparu dae sas bardanas de sos Gigantes.

Testu in sardu de Mariantonietta Piga

Coordinamentu editoriale de Angelo Canu